தமுமுக கீழக்கரை நகர் புதிய நிர்வாகிகள் தேர்வு !

கீழக்கரை நகர் தமுமுக மற்றும் மமக பொதுக்குழுக் கூட்டம் 16 ; 12 :2011 அன்று மாலை 6 :30 மணிக்கு கீழக்கரை நடைபெற்றது. மாவட்டத் தலைவர் சலிமுல்லாகான் தலைமை வகித்தார். மாவட்ட நிர்வாகிகள் முன்னிலை வகித்தனர். காயல் ஜகரிய அலீம் சிறப்புரையாற்றினர். பின்னர் கீழக்கரை நகர் புதிய நிர்வாகிகள் தேர்வு செய்யப்பட்டனர்.

விபரம் கீழ் வருமாறு :-
தலைவர்: ஐ.செய்யது இபுராகிம். 9789396930
செயலாளர்: ஹெச்.சீனி ஜகுபர் சாதிக். 9150730600
பொருளாலர்: ஏ.சேக் தாவுத் சாதிக். 9940911554
மமக செயலாளர்: எம்.ஏ.ஹமீது இக்பால். 9442522114
துணை தலைவர்: அபுதாகிர்
துணை செயலாளர்: புகாரி. 948721489
மமக துணை செயலாளர்:கே.ராஜா ஹூசைன். 9047015891

கீழக்கரை முழுவதும் புகைபோக்கி இய‌ந்திர‌ம் மூல‌ம் கொசும‌ருந்து அடிக்கும் ப‌ணி துவ‌க்க‌ம் !

பொதுவாக மழை காலம் வந்து விட்டால் கொசுக்கள் மிக அதிகமாக வந்துவிடும். சாலைகளில் தண்ணீர் தேங்கி கொசுக்கள் வேகமாக பரவும். இதனால் மலேரியா,டெங்கு நோய்களும் உருவாகிறது. தற்போது கீழக்கரை நகரில் கொசுக்களை ஒழிப்பதற்கான நடவடிக்கைகள் கீழக்கரை நகரில் நகராட்சியால் மேற்கொள்ளப்பட்டு வ‌ருகிற‌து.

இது குறித்து ந‌க‌ராட்சி த‌லைவ‌ர் ராபிய‌த்துல் காத‌ரியா கூறிய‌தாவ‌து,
பழைய இயந்திரங்கள் பழுதடைந்த நிலையில் உடனடி நடவடிக்கையாக புதிய‌தாக‌ இர‌ண்டு புகை போக்கி இய‌ந்திர‌ங்க‌ள் வாங்க‌ப்ப‌ட்டு கீழக்கரையில் உள்ள‌ அனைத்து வார்டுக‌ளிலும் கொசு ம‌ருந்து புகை ப‌ர‌ப்பும் ப‌ணி துரிதமாக துவங்க‌ப்ப‌ட்டுள்ள‌து.

சாலையா ? கழிவுநீர் சாலையா ?

கீழக்கரை 17வது வார்டுக்கு உட்பட்ட புதுத்தெரு ஜாமியா நகர் பள்ளிவாசல் அருகே நீண்ட நாட்களாக சாக்கடை நீர் தேங்கியுள்ளதால் இப்பகுதி மக்கள் பாதிக்கப்பட்டுள்ளனர்.

இது குறித்து சாஹிர் என்பவர் கூறுகையில் ,புதுத்தெரு ஜாமியா நகர் தொழுகைப்பள்ளி அருகே கழிவு நீர் தேங்கியுள்ளதை நீங்கள் காணலாம்.இந்த வழியாகத்தான் ஹமீதிய ஆண்கள் மேல்நிலை பள்ளிக்கு மாணவர்கள் செல்கின்றனர்.இந்த கழிவு நீரை தாண்டிதான் செல்கின்றனர்.சில சமயம் சைக்கிளில் செல்லும் மாணவர்கள் கீழே விழுந்து அடிபடும் நிலையும் ஏற்படுகிறது.கீழக்கரை நகராட்சிக்கு இதுகுறித்து புகார் அளிக்கப்பட்டுள்ளது.இது வரை சுத்தம் செய்யப்படவில்லை.தயவு கூர்ந்து உடனடி நடவடிக்கை எடுக்க வேண்டும் என்றார்

இது குறித்து நகராட்சி தலைவர் ராபியத்துல் காதரியாவிடம் கேட்ட போது, இதற்கு நிரந்தர தீர்வு(கழிவு நீர் தொட்டி அமைக்க) காண்பதற்கு 5 சென்ட் இடம் தேவைபடுகிறது இதற்காக‌ உரியவர்களிடம் பேசி வருகிறோம்.விரைவில் இப்பிரச்சனையை தீர்ப்போம் என்றார்.

அப்பகுதியை சேர்ந்த அப்துல் காதர் என்பவர் கூறுகையில் ,நிரந்தர தீர்வு வரும் வரை கழிவுநீர் அகற்றும் லாரிகளில் உறிஞ்சும் குழாய்கள் மூலம் கழிவு நீரை உடனடியாக அகற்ற வேண்டும்.

+1 தேர்வில் நபிகள் பெயர் பிழையாக அச்சடிப்பு !மாணவர்கள் ஆவேசம் !

பைரோஸ் கான்
ராமநாதபுரம் மாவட்டத்தில் பிளஸ் 1 அரையாண்டு தேர்வு தமிழ் முதல் வினாத்தாளில் நபிகள் என்பதற்கு பதிலாக நரிகள் என இருந்ததால், பெரியபட்டினத்தில் முஸ்லிம் அமைப்பு மற்றும் பழைய மாணவர்கள் சங்கத்தினர் பள்ளியை முற்றுகையிட்டனர். ராமநாதபுரம் மாவட்டத்தில் நேற்று முன் தினம் பிளஸ் 1 மாணவர்களுக்கான தமிழ் முதல் தாள் தேர்வு நடந்தது. இதில் 18வது கேள்வியில் "அபூபக்கருடைய அன்பின் ஆற்றலும், நரிகள் நஞ்சு தீர்த்து அருளியதும்' என்ற கேள்வி இடம் பெற்றது. இதில் நபிகள் என்பதற்கு பதிலாக நரிகள் என பிழையாக இருந்ததால் மாணவர்கள் அதிர்ச்சிக்கும் ஆவேசத்துக்குள்ளாகினர்.
பெரியபட்டினம் பி.எப்.ஐ., நகர் தலைவர் முகம்மது சலீம், மாவட்ட செயலாளர் அசன் அலி, எஸ்.டி.பி.ஐ.,தொகுதி தலைவர் பைரோஸ் கான் மற்றும் ஏராளமானோர் அரசு மேல்நிலைப் பள்ளியை முற்றுகையிட்டனர்.

அங்கு தலைமை ஆசிரியர் இல்லாததால் தமிழாசிரியர் முருகனிடம் நடவடிக்கை கோரி மனு அளித்தனர்.
எஸ்.டி.பி.ஐ., தொகுதி செயலாளர் பைரோஸ் கான் கூறியதாவது:முஸ்லிம்களின் உணர்வுகளை புண்படுத்தும் விதமாகவும், வரலாற்று சம்பவங்களை திரித்துக் கூறும் விதமாகவும் கேள்வி அமைந்துள்ளது. துறை ரீதியாக சம்பந்தப்பட்டவர்கள் மீது நடவடிக்கை எடுக்க வேண்டும், என்றார்.
முதன்மை கல்வி அலுவலர் செல்லம் கூறியதாவது: அச்சுப்பிழையால் இந்த தவறு நேர்ந்தது. ஒவ்வொரு பள்ளி தலைமை ஆசிரியர்களிடம் கூறி தவறை சரி செய்ய கூறியிருந்தோம். இதை மீறியவர்கள் மீது நடவடிக்கை எடுக்கப்படும், என்றார்.

கீழக்கரை சாலையை சீரமைக்க நெடுஞ்சாலைத்துறையிடம் நகராட்சி தலைவர் மனு !

கீழக்கரை முக்கு ரோட்டிலிருந்து கடற்கரையில் உள்ள பெட்ரோல் பங்க் வரை அமைந்துள்ள வள்ளல் சீதக்காதி சாலையை சீரமைக்க ராமநாதபுரம் நெடுஞ்சாலை துறை அலுவலகம் சென்று அத்துறை அதிகாரி பவுன் ராஜிடம் கீழக்கரை நகராட்சி தலைவர் ராபியத்துல் காதரியா மனு கொடுத்தார்.

விரைவில் இது தொடர்பாக மேல் அதிகாரிகளுடன் கலந்து பேசி முடிவெடுக்கப்பட்டு சாலை சீரமைக்கபடும் என்று பவுன் ராஜ உறுதியளித்தார்.இந்த‌ சாலை நெடுஞ்சாலை துறை பொறுப்பில் இருந்து வ‌ருகிறது.

கீழ‌க்க‌ரையில் முக்கிய‌ சாலையான வள்ளல் சீதக்காதி சாலை குண்டும் குழியுமாக‌ காண‌ப்ப‌டுகிற‌து.நீண்ட‌ கால‌மாக‌ இந்த‌ சாலையை சீர‌மைக்க‌ கோரிக்கை இருந்து வ‌ருவ‌து குறிப்பிட‌ த‌க்க‌து.

கீழக்கரை அரசு தலைமை மருத்துவரின் நடவடிக்கையால் நோயாளிகள் அவதி!

கீழக்கரையில் அரசு மருத்துவமனையில் குவிந்துள்ள மக்கள்

கீழக்கரை அரசு மருத்துவமனையில்(செவ்வாய்,வியாழன்) ஆகிய இரண்டு நாட்கள் சர்க்கரை நோயாளிகளுக்கும்,இருதய நோயாளிகளுக்கும் மருந்து வழங்கப்பட்டு வந்தது.ஆனால் அதை மாற்றி கடந்த மூன்று மாதங்களாக மாதத்திற்கு இரண்டு முறை மட்டுமே மருந்துகள் கொடுக்கப்படுகிறது இதனால் ஏழை எளிய மக்கள் மிகுந்த பாதிப்புக்குள்ளாகியுள்ளனர்.

இது குறித்து கீழக்கரையை முகம்மது ஹனிபா என்பவர் கூறுகையில், எனக்கு சர்க்கரை நோய் உள்ளது தனியார் கடைகளில் பணம் கொடுத்து வாங்கும் அளவுக்கு எனக்கு வசதியில்லை அரசு மருத்துவமனையில்தான் பல ஆண்டுகளாக மருந்து வாங்கி சாப்பிட்டு வருகிறேன். இந்த மூன்று மாதங்களாக இரண்டு முறைதான் மருந்து தருகின்றனர்.இதனால் கூட்டம் அதிகமாக உள்ளது காலை 7 மணியிலிருந்து வரிசையில் நின்று சென்றால் மருந்து தீர்ந்து விட்டது என்று கூறுகின்றனர் அடுத்த முறை மருந்து தரும் வரை நான் காத்திருக்க வேண்டும் என்றார் வருத்தத்துடன்

கீழக்கரை சின்னக்கடை தெருவை சேர்ந்த முஸ்தபா கூறியாதவது ,இத்தனை ஆண்டுகளாக மருந்துகள் தட்டுபாடு இல்லாமல் கிடைத்து கொண்டிருந்தது.ஆனால் தற்போது மருந்து மருத்துவமனையில் ஸ்டாக் இல்லை என்று கூறி நோயாளிகளை திருப்பி அனுப்பி விடுகின்றனர்.உடனடியாக மக்கள் பிரதிநிதிகள் ,மாவட்ட ஆட்சியர் தலையிட்டு மீண்டும் வாரத்திற்கு இரண்டு முறை மருந்துகள் வழங்க நடவடிக்கை எடுக்க வேண்டும்.மேலும் தலைமை மருத்துவர் கூறுவது போல் மாற்று மருந்து தருவதில்லை என்றார்

இது பற்றி தலைமை மருத்துவர் அங்காரெட்டி கூறியதாவது, ஒரு சில மருந்துகள் வருவதில்லை அதற்கு பதில் மாற்று மருந்து கொடுக்கிறோம் .மேலும் மாதத்திற்கு 2 முறை மட்டும் கொடுப்பது என்ற முடிவை அனைத்து மருத்துவர்களிடமும் கலந்து ஆலோசனை செய்து தான் எடுத்தேன்.

ஜவாஹிருல்லாஹ் எம்.எல்.ஏ ,மாவட்ட ஆட்யை மீண்டும் கீழக்கரை அரசு மருத்துவமனையில் ஆய்வு மேற்கொண்டு நடவடிக்கை எடுக்க வேண்டும் ஏழை எளிய‌ ம‌க்க‌ளை பாதிப்ப‌டைய‌ செய்யும் இந்த‌ விச‌ய‌த்தில் உட‌ன‌டி க‌வ‌ன‌ம் செலுத்த ‌ வேண்டும்

கீழக்கரை - ஏர்வாடி சாலைகளில் தள்ளப்படும் மனநோயாளிகள் !

கீழ‌க்க‌ரை - ராம‌நாதபுர‌ம் சாலையில் ம‌ன‌நோயாளி (ப‌ழைய‌ ப‌டம்)

கீழ‌க்க‌ரையில் சுற்றி திரிந்த ம‌னநோயாளி

ஏர்வாடி த‌ர்ஹாவில் சுற்றி திரிந்த மன நோயாளிகள் அர‌சு அதிகாரிக‌ளால் வாக‌ன‌ங்களில் மனநல காப்பகத்துக்கு அழைத்து செல்லப்பட்டனர்

வெளியூரை சிலர் மன நோயாளிகளை வாகனங்களில் அழைத்து வந்து ஏர்வாடி தர்ஹா - கீழக்கரை சாலைகளில் இறக்கி விட்டு செல்லும் அவலம் நீண்ட காலமாக இப்பகுதியில் நிகழ்ந்து வருகிறது. இவ்வாறு இறக்கி விடப்பட்ட மனநோயாளிகள் அருகிலுள்ள ஏர்வாடி தர்காவிற்கும்,எஞ்சியவர்கள் கீழக்கரை மற்றும் அருகிலுள்ள ஊர்களில் பரிதாபமாக சுற்றி திரிகிறார்கள்.
இநிலையில் தற்போது 10க்கும் மேற்பட்ட மன நோயாளிகள் கீழக்கரை நகருக்குள் சுற்றி திரிகிறார்கள்.ஒரு சிலர் தலையில் காயங்களுடன் உள்ளார்கள்.ஒரு சில ம‌ன‌நோயாளிகள் கடைக்கு கற்கள் எரிவது,சிறுவர் சிறுமிகளை தாக்குவது போன்ற செயல்களில் ஈடுபடுகிறார்கள்.ஒரு சிலர் நடுரோட்டில் படுத்து உறங்குகிறார்கள்.

இது குறித்து கீழக்கரையை சேர்ந்த ஹாஜா முகைதீன் என்பவர் கூறுகையில் ,சமீபத்தில் ஏர்வாடி தர்ஹாவில் சுற்றி திரிந்த மன நோயளிகளை சுகாதாரத்துறையினர் வாகன‌ங்களில் ஏற்றி மன நல மருத்துவமனைக்கு அழைத்து சென்றனர். அதுபோல் கீழக்கரையில் சுற்றி திரியும் இவர்களையும் அழைத்து செல்ல வேண்டும்.மேலும் கேரளாவை சேர்ந்த‌வ‌ர்க‌ள்தான் இதுபோல் ம‌ன‌நோயாளிக‌ளை சாலைக‌ளில் இற‌க்கிவிட்டு செல்கிறார்க‌ள்.இர‌க்க‌மில்லாம‌ல் இதுபோன்ற‌ செய‌ல்க‌ளில் ஈடுப‌டும் இவ‌ர்க‌ள் மீது காவ‌ல்துறையின‌ர் ந‌ட‌வ‌டிக்கை வேண்டும் என்றார்.

ஏர்வாடி தர்ஹாவில் கடந்த 2002 ஆக.,6ல் மன நலகாப்பகத்தில் தீவிபத்து நடந்தது. இதில் 28 மனநோயாளிகள் தீயில் கருகி உயிரழந்தனர். மனநோயாளிகள் சங்கிலியால் கட்டப்ப‌ட்டு இருந்ததால் தப்பிக்க முடியாமல் உயிரழப்பு அதிகமாக இருந்தது பின்னர் வ‌ழ‌க்க‌ம் போல் அசம்பாவிதம் ந‌டைபெற்ற‌ பிற‌கு தான் அர‌சாங்க‌ அனும‌தியில்லாம‌ல் ஏர்வாடி தர்ஹாவில் ந‌ட‌த்த‌ப்ப‌ட்ட‌ அனைத்து ம‌ன‌ந‌ல காப்ப‌க‌ங்க‌ளும் அர‌சின் ந‌ட‌வ‌டிக்கையால் மூட‌ப்ப‌ட்ட‌து.இச்சம்பவத்திற்கு பிறகும் ம‌ன‌ நோயால் பாதிப்ப‌டைந்த‌வ‌ர்க‌ளை ஏர்வாடி த‌ர்ஹாவிற்கு அழைத்து வ‌ந்தால் குண‌மாகும் என்று ப‌ல‌ர் அவ‌ர்களின் ந‌ம்பிக்கையின் அடிப்ப‌டையில் இப்ப‌குதிக்கு அழைத்து வந்தவாறு இருந்தார்கள்.எனவே அரசே மனநலகாப்பகம் அமைக்க வேண்டும் என இப்பகுதி பொது மக்கள் கோரிக்கை விடுத்தனர். காப்பகங்களை அமைக்க எந்த துறையின் கீழ் இப்பணியை மேற்கொள்வது என்ற சந்தேகம் அப்போது எழுந்தது. இதுவே அரசு காப்பக பணிகள் முடங்க முதல் காரணமானது. இப்பிரச்னையில் அமைக்கப்பட்ட ராமதாஸ் கமிஷனின் பரிந்துரையின் படி, மாவட்ட மருத்துவமனையில் மனநலபிரிவு தொடங்க, கோர்ட் உத்தரவிட்டது. அதன் படி மனநலபிரிவும் ஏற்படுத்தப்பட்டும், அரசு காப்பகம் இல்லாததால் அது பயனற்று உள்ளது. ஏர்வாடி த‌ர்ஹாவை சேர்ந்த‌வ‌ர்க‌ள் ம‌ன‌ ந‌ல காப்ப‌க‌ம் அமைப்ப‌த‌ற்கு அரசுக்கு இட‌ம் த‌ருவ‌தாக‌ அறிவித்து நீண்ட‌ கால‌மாகி விட்ட‌து ஆனால் மனநல காப்பகம் அமைப்பதற்கு அர‌சு எவ்வித‌ ந‌ட‌வ‌டிக்கையும் எடுக்க‌வில்லை.

விரைவில் அர‌சு ஏர்வாடி த‌ர்ஹாவில் ம‌ன‌ந‌ல‌ காப்ப‌க‌ம் அமைக்கப்பட்டால் இது தொட‌ர்பான‌ ப‌ல்வேறு பிர‌ச்ச‌னைக‌ளுக்கு முற்றுப்புள்ளி வைக்கப்பட்டு விடும்

கண்ணாடிகள் கவனம்., M அப்துல் ரஹ்மான் M.P.

M அப்துல் ரஹ்மான் M.P.

நன்றி:ஹைர உம்மத்- அக்டோபர் - டிசம்பர் 2011

நமது சமுதாயம் சந்தித்து வருகின்ற பிரச்னைகளில் மிக முக்கியமானது வரம்பு மீறிய காதல் பிரச்னைதான். ஓடிப்போகும் சீரழிவுச் செய்தி எல்லாப் பகுதிகளிலிருந்தும் நீக்கமற வந்த வண்ணமிருக்கின்றன. இதற்கெல்லாம் இதுதான் காரணமென்று பொத்தம்பொதுவாய் ஒன்றைச் சொல்ல முடியாது. செல்போன், சின்னத்திரை, பெரிய திரை, கல்வி நிலையங்களில் கலந்து பழகுதல் எனப் பல காரணங்களைச் சொல்லலாம். காரணம் எதுவாயினும் சரி செய்யப்பட வேண்டிய தலையாய விசயம் இது. இந்தப் பொறுப்பும் கடமையும் பெற்றோர்களையே சாருகின்றது.

பெற்றோர்களின் கவனக்குறைவினால்தானே அவர்கள் கீழிறங்கிப் போகின்றார்கள். செல்போன், தொலைக்காட்சி, இணையதளம் ஆகிய வசதிகளை ஏற்படுத்தித் தருவதோடு பெற்றோர்களின் பங்கு முடிந்து விடுவதில்லை. அதை அவர்கள் எப்படிப்பயன்படுத்த வேண்டும் என்பதைச் சொல்லித்தர வேண்டும். அதன் நன்மை தீமைகளை விளக்கித் தர வேண்டும். தீவிர கண்காணிப்பும் வேண்டும். மீறும்போது கண்டிக்கவும் வேண்டும்.
தொடர்ந்து தொலைக்காட்சி பார்க்கும்போது அதில் காட்டப்படும் கற்பனைக் காட்சிகளால் ஈர்க்கப்படும் பிள்ளைகள் இளமைக்கால தூண்டுதலால் தானும் அதுபோல செய்ய வேண்டுமென உந்தப்படுகிறார்கள். பிள்ளைகளை வைத்துக்கொண்டே தொடர்நாடகங்கள், சினிமாக்களைப் பார்க்கின்றோம். வரம்பு மீறிய காட்சிகளைப் பார்க்கும் சூழலை நாமே உருவாக்கித் தருகின்றோம். பெற்றோர்கள் நல்ல முன்மாதிரிகளாக இருந்து தொலைக்காட்சித் தொடர்களைப் பார்ப்பதைத் தவிர்க்க வேண்டும்.

நம் பிள்ளைகள் தனி அறையில் நீண்டநேரம் யாரோடு பேசிக்கொண்டிருக்கின்றார்கள்? என்பதைக் கண்காணிக்க வேண்டும். அவர்களின் கல்லூரி நண்பர்கள் யார்? யாரோடெல்லாம் பழகுகின்றார்கள் என்பதையும் கவனிக்க வேண்டும். செலவுகளுக்காக அதிகமாகப் பணம் கொடுப்பதையும் தவிர்க்க வேண்டும். அதிக நகைகளை அணிவிக்காமலிருப்பதும், நகைகள் இருக்குமிடம், பணப்புழக்கம் அவர்களுக்குத் தெரியாமலிருப்பதும் நல்லது. ஏனென்றால் ஓடிப்போகலாம் என்று அவர்கள் முடிவெடுக்கும்போது பணபலமும் அவர்களுக்குச் சக்தி ஊட்டும் அம்சமாக இருக்கலாம். நம் பிள்ளைகளின் உரிமைகளில் தலையிடலாமா? என்றெல்லாம் பார்க்காமல் அவர்களின் நலன்களைக் கருதி கண்காணிக்க வேண்டும். ‘படியில் பார்த்து இறங்கு’ என்று சொல்வது அவர்கள் ‘கீழே விழப் போகிறார்கள்’ என்பதற்காக அல்ல. ‘கீழே விழுந்து விடக்கூடாது’ என்பதற்காகத்தான். எல்லாவற்றிற்கும் மேலாக இறையச்சத்தையும், மறுமைச் சிந்தனைகளையும் ஊட்டி வளர்க்க வேண்டும். ஒழுக்க மாண்புகளை விதைக்க வேண்டும்.

குர்ஆனும், நபி (ஸல்) அவர்களின் அழகிய வாழ்வுமுறைகளையும் தெளிவாகப் போதித்தாலே அவர்கள் சிறந்தவர்களாக வளர்வதற்குப் போதுமானதாகும். பெண்கள் கண்ணாடிகளைப் போன்றவர்கள் என்றார்கள் நபி (ஸல்) அவர்கள். பெண்களை கண்ணாடியைப் போன்று பாதுகாக்க வேண்டும். கை தவறினால் கீழே விழுந்து உடைந்து நொறுங்கும். நம் காலையே அது குத்திக் கிழிக்கும். கவனமோடு நம் பிள்ளைகளை வளர்ப்போம். கண்ணாடிகள் கவனம்.


M அப்துல் ரஹ்மான் M.P.
வேலூர் பாராளுமன்ற உறுப்பினர்

கைராத்துல் ஜலாலியா பள்ளி அருகே சுகாதார கேடு !பொதுமக்கள் கோரிக்கை !

கிழக்குதெரு மற்றும் வடக்குத்தெரு பகுதிகளில் போர்க்கால அடிப்படையில் குப்பைகளை அகற்றும்படி பொதுமக்கள் கோரிக்கை விடுத்துள்ளனர்.


கிழக்கு தெரு கைராத்துல் ஜலாலியா தொடக்கப்பள்ளியின் சுவரை ஓட்டி ஏராளமான குப்பைகள் குவிந்து துர்நாற்றம் வீசுகிறது.ஏராளமான மாடுகளும் அப்பகுதியில் சுற்றி திரிகின்றன.இதனால் சுகாதார சீர்கேடு ஏற்பட்டு அவ்வழியாக பள்ளிக்கு செல்லும் குழந்தைகளுக்கு மலேரியா போன்ற தொற்று நோய்கள் அடிக்கடி உண்டாவதாக இப்பகுதி மக்கள் கூறுகின்றனர்.மேல்நிலைப்பள்ளி அருகேயும் இதே போல் குப்பைகள் குவிந்துள்ளது

இது குறித்து அப்பகுதியை சேர்ந்த ஹசீனா என்பவர் கூறுகையில் ,இந்த குப்பைகளை அகற்றி நிரந்தர தீர்வு காண வேண்டும் என்று 200க்கு அதிகமான பெற்றோர்கள் கையெழுத்திட்டு நகராட்சியில் புகார் மனு கொடுத்துள்ளோம் ஆனால் இது வரை எந்த நடவடிக்கையும் இல்லை இனியாவது நகராட்சி நிர்வகம் உடனடியாக நடவடிக்கை எடுத்து குழந்தைகள் நலனை காக்க வேண்டும் என்றார்

அப்பகுதியை சேர்ந்த ராசீக்தீன் என்பவர் கூறுகையில் ,நகராட்சி நடவடிக்கை எடுத்து குப்பைகள் அகற்றப்பட்டாலும் பொதுமக்கள் பள்ளி அருகே குப்பையை கொட்டாமல் இருக்க வேண்டும் அப்போதுதான் இப்பகுதி சுத்தாமகும் என்றார்.
_____________________________________________________________________________________________
அதே போல் வடக்கு தெரு பள்ளி வாசல் அருகே கொட்டப்படும் குப்பைகளை விரைவாக அகற்ற நடவடிக்கை எடுக்க அப்பகுதிவாசிகள் கோரிக்கை விடுத்துள்ளனர்.


இது குறித்து சாதிக் என்பவர் கூறுகையில் , இங்கே கொட்டப்படும் குப்பைகளை எட்டு நாட்களுக்கு ஒருமுறைதான் துப்புரவு செய்கின்றனர்.இதனால் அருகில் உள்ள வீடுகளில் இருப்பவர்கள் துர்நாற்றத்தால் அவதிபடுகின்றனர்.இதனால் கொசுக்கள் அதிகமாகி ஒருவ‌ர் மாற்றி ஒருவ‌ர் காய்ச்சலில் பாதிக்கப்பட்டு தின‌மும் ம‌ருத்துவ‌ம‌னைக்கு செல்ல‌ வேண்டியுள்ள‌து.அருகிலேயே தொழுகை ப‌ள்ளி இருப்ப‌தால் இவ்வழியே தொழுகைக்கு செல்ப‌வ‌ர்க‌ளும் பாதிப்புக்குள்ளாகிறார்க‌ள். ப‌ல் வேறு சுகாதார ந‌ட‌வ‌டிக்கைக‌ள் எடுத்து வ‌ரும் ந‌க‌ராட்சி நிர்வாக‌ம் இப்ப‌குதியில் உட‌ன‌டி ந‌ட‌வ‌டிக்கை எடுக்க‌ வேண்டும் என‌ கேட்டுகொள்கிறோம் என்றார்.

நகராட்சி தலைவர் மீது குற்றச்சாட்டு !நகராட்சி தலைவர் மறுப்பு

நகராட்சி தலைவர் ராபியத்துல் காதரியா


18வது வார்டு கவுன்சிலர் முகைதீன் இப்ராகிம்

கீழக்கரை 18வது வார்டு கவுன்சிலர் முகைதீன் இப்ராகிம் வெளியிட்டுள்ள அறிக்கையில் கூறியிருப்பதாவது,

கீழக்கரைக்கு செல்வந்தர்களின் அழைப்பின் பேரில் வருகை தந்த புரிந்த மலேசியாவின் மலேசியாவின் சரவாக் மாநில முதல்வர் அப்துல் தையூப் முகம்மது கீழக்கரை நகராட்சிக்கு வருகை புரிய இருப்பதாகவும் ,மக்கள் பிரதிநிதிகளை சந்திக்க இருப்பதாகவும் இதற்காக அனைத்து உறுப்பினர்களும் நகராட்சி அலுவலகத்துக்கு வர வேண்டும் என சேர்மன் ராபியத்துல் காதரியா அவர்கள் தொலைபேசியின் வாயிலாக அழைத்ததின் பேரில் சேர்மன் அவர்களுக்கு மதிப்பளித்து பல பெண் உறுப்பினர்கள் உள்பட பெரும்பான்மையான கவுன்சிலர்கள் தங்கள் அலுவல்களை விட்டு விட்டு பகல் 12 மணியிலிருந்து அலுவலகத்தில் கூடினர்.

சுமார் 1.30 மணியளவில் நகராட்சி வழியாக வருகை புரிந்த மலேசியாவின் விருந்தினர்களுக்கு சேர்மன் ராபியத்துல் காதரியா அவர்கள் மரபை பின்பற்றாமல் சாலையிலேயே வரவேற்பு அளித்தனர்.அவருடன் அவருக்கு வேண்டிய நபர்கள் மட்டுமே விருந்தினர்களுக்கு சால்வை போற்ற அனுமதிக்கப்பட்டனர். சுமார் 5 நிமிடங்கள் சாலையிலேயே வரவேற்பு முடிந்து நகராட்சி அலுவலகத்திற்கு அழைத்து வந்து ஆணையர் அறைக்கு விருந்தினர்கள் அழைத்து செல்லப்பட்டனர்.சேர்மன் அவர்களும் அவருக்கு வேண்டியவர்கள் மட்டுமே ஆணையர் அறைக்கு அனுமதிக்கப்பட்டனர்.

சேர்மன் அவர்களால் அழைக்கப்பட்ட கவுன்சிலர்கள், தங்களை அழைத்து அறிமுகம் செய்வதுடன்,ஊர் நலனை பற்றி கலந்தாய்வு கூட்டம் நடைபெறும் ஊரின் நலன்கள் பற்றி பேசலாம் என்று ஆவலுடன் எதிர்பார்த்திருந்தனர்.ஆனால் ஆணையர் அறையில் இருந்த அவர்கள் சில நிமிட நேரங்களிலேயே தன் சகாக்களுடன் தன் வாகனங்களை நோக்கி சென்றார்கள்.இதனால் அனைத்து கவுன்சிலர்களும் செய்வது அறியாது திகைத்து நின்றனர்.

இதனால் மனம் குமுறிய கவுன்சிலர்கள் சேர்மன் அவர்களிடம் "எதற்காக எங்களை அழைத்தீர்கள் இச்சம்பவம் எங்களை மனம் புண்பட வைத்து விட்டது "என்றோம் அதற்கு சேர்மன் ராபியத்துல் காதரியா "கீழக்கரைக்கு வந்த சிறப்பு விருந்தினர் நகராட்சி அலுவலகத்திற்கு வரும் திட்டம் இல்லை என்றும், நாங்கள்தான் வற்புறுத்தி வழியில் அழைக்க ஏற்பாடு செய்தோம்" என கூறினார்.

நகராட்சி அலுவலகத்திற்கு வர திட்டம் இல்லாத கெளரவ அழைப்பாளரை ஏன் வற்புறுத்தி நகராட்சி அலுவலகம் முன் நிறுத்தி நெறிமுறைக்கு அப்பாற்ப்பட்டு வரவேற்க வேண்டும்.?எதற்காக கவுன்சிலர்களை அழைக்க வேண்டும்? புரியாத புதிராக உள்ளது.
இனி வ‌ருங்கால‌ங்க‌ளிலாவ‌து இது போன்ற ச‌ம்ப‌வ‌ங்க‌ள் ந‌டைபெறாம‌ல் விழிப்புட‌ன் இருக்க‌ வேண்டும்.க‌வுன்சில‌ர்க‌ளின் உண‌ர்வுக‌ளுக்கு ம‌திப்ப‌ளிக்க‌ வேண்டும் இவ்வாறு அவ‌ர் கூறியுள்ளார்.

இந்த குற்றச்சாட்டு குறித்து நகராட்சி தலைவர் ராபியத்துல் காதரியாவிடம் கேட்ட போது அவர் கூறியதாவது,
கீழக்கரைக்கு மற்றொரு நாட்டின் மாநில முதல்வர் வருகை தருகிறார் என்ற அடிப்படையில் அவரை நமது நகராட்சி சார்பாக வரவேற்று கண்ணியபடுத்த வேண்டும் என்ற நோக்கத்தில்தான் வரவேற்பளித்தோம்.கவுன்சிலர்களுக்கு முக்கியத்துவம் அளிக்க வேண்டும் என்பதினால்தால் அனைத்து கவுன்சிலர்களையும் அழைத்தேன்.விருந்தினருக்கு துணை தலைவர் உள்பட சில கவுன்சிலர்களும் பொன்னாடை போற்றி கவுரவித்தார்கள்.சூழ்நிலையின் காரணமாக சிறப்பு விருந்தினர் உடனடியாக செல்ல வேண்டும் என்று கூறியதால் அனைவரையும் சிறப்பு விருந்தினர் சந்திக்க இயலாமல் போய் விட்டது. மற்ற‌ப்படி எந்த உள்நோக்கமும் இல்லை ஒரு சிலரின் தூண்டுதலின் பேரில் இது போன்ற குற்றச்சாட்டுகளை சொல்கிறார் என்று எண்ண தோன்றுகிறது.

தாசிம் பீவி கல்லூரிக்கு மலேசியாவின் சரவாக் முதல்வர் ரூ.7.50 லட்சம் நன்கொடை !

தாசிம் பீவி மகளிர் கல்லூரியில் கீழக்கரை வந்துள்ள மலேசியாவின் சரவாக் மாநில முதல்வர் அப்துல் தையூப் முகம்மதுக்கு வரவேற்பு நிகழ்ச்சி நடைபெற்றது.

இவ்விழாவில் சரவாக் மாநில இஸ்லாம் இயக்க வளர்ச்சி துறை அமைச்சர் அலிஹசன்,இணை அமைச்சர் தாவூது அப்துல் ரஹ்மான் உள்ளிட்ட குழுவினர் கலந்து கொண்டனர்

சர‌வாக் மாநில‌ முத‌ல்வ‌ர் பேசுகையில் ,இந்த‌ க‌ல்லூரியில் ப‌யிலும் ஆயிர‌க்க‌ண‌க்கான‌ மாண‌விக‌ளை ச‌ந்திப்ப‌து மிக‌வும் ம‌கிழ்ச்சியாக‌ உள்ள‌து. பெண்க‌ள் அதிக‌ அள‌வில் க‌ல்வி கற்க‌ வேண்டும் உல‌மய‌மாக்க‌ல் ந‌ம்மை நெருக்க‌மாக‌ ஆக்கி விட்ட‌து.இந்தியா க‌ணிணி துறையில் ந‌ல்ல‌ முன்னேற்ற‌த்தை க‌ண்டுள்ள‌து.இந்தியா ம‌னித‌ வ‌ள‌த்துறையில் வ‌லிமையாக‌ உள்ள‌து. இது ஆர‌ம்ப‌ம் தான் இன்னும் அதிக‌ம் சாதிக்க‌ வேண்டியுள்ள‌து.உல‌க‌ம‌ய‌மாக்க‌ல் மூல‌ம் இந்த் க‌ல்லூரியும் எங்க‌ள் நாட்டு ப‌ல்கலைக‌ழ‌க‌ங்க‌ளோடு இணைந்து ப‌ணியாற்றும் வாய்ப்பை பெறுகிற‌து. மேலும் இப்ப‌குதி பெண்க‌ளை மேம்ப‌டுத்த‌ பாடுப‌டும் இக்க‌ல்லூரி நிர்வாக‌த்திற்கு என‌து பாராட்டுக்க‌ளை தெரிவித்து கொள்கிறேன்.எங்க‌ள் நாட்டின் சார்பாக‌ உங்க‌ள் ஆடிட்டோரித்திற்கு ரூ 7.50 ல‌ட்ச‌ம் ந‌ன்கொடையாக‌ வ‌ழ‌ங்குகிறேன். உல‌க‌ம் மிக‌வும் சுருங்கி விட்ட‌து நாம் ந‌ம்மை த‌யார்ப‌டுத்தி கொள்வோம்.இவ்வாறு அவ‌ர் பேசினார்.
க‌ல்லூரியின் துணை முத‌ல்வ‌ர் நாதிர‌பானு க‌மால் ந‌ன்றி கூறினார்.

அற்புதம்... !கீழக்கரையில் மலேசியாவின் சராவ‌க் மாநில முதல்வர் வியப்பு !

கீழக்கரைக்கு மலேசியாவில் உள்ள சரவாக் மாநில முதல்வர் அப்துல் தையூப் முகம்மது வருகை தந்தார். அவருக்கு நகராட்சி தலைவர் ராபியத்துல் காதரியா தலைமையில் துணை தலைவர் ஹாஜா முகைதீன் மற்றும் கவுன்சிலர்கள் ,பொதுமக்கள் உள்ளிட்டோர் வரவேற்றனர். அவருடன் அவரது மனைவி ரசாத் தையூப்,இஸ்லாம் இயக்க வளர்ச்சி துறை அமைச்சர் அலிஹசன் மற்றும் அவரது மனைவி ,வளர்ச்சித்துறை இணை அமைச்சர் தாவூது அப்துல் ரஹ்மான் அவரது மனைவி ஆகியோர் வந்துருந்தனர்.பின்னர் நடுத்தெரு ஜும்மா பள்ளி சென்று தனது குழுவினருடன் பார்வையிட்டார் பின்னர் அங்கு நடைபெற்ற தொழுகையில் கலந்து கொண்டார்.

சராவ‌க் முதல்வர் நிருபர்களிடம் கூறுகையில் , அரசு பணி நிமித்தமாக கேரளாவிற்கு வந்திருந்தோம்.கீழக்கரையை பற்றி நிறைய கேள்விபட்டுள்ளேன்.நேரில் சென்று காண வேண்டும் என்ற நோக்கத்தில் கீழக்கரை வந்துள்ளேன். தமிழர்களின் வரவேற்பு,கலாச்சாரம் மற்றும் கீழக்கரை நடுத்தெரு ஜீம்மா பள்ளியின் அழகு தொழில் நுட்ப கட்டுமானம்,அற்புதமாக வடிவமைக்கப்பட்டுள்ளது. இது போன்றவை எங்களை வியப்படைய வைக்கிறது இப்பகுதி மக்களின் வரவேற்பிற்க்கு நன்றியை தெரிவித்து கொள்கிறேன் என்றார்.

சரவாக் மாநில முதல்வர் அப்துல் தையூப் முகம்மது தனது குழுவினருடன் ஏர்வாடி தர்ஹா சென்று வந்தார்.
சில மாதங்களுக்கு முன் கீழக்கரை வருகை புரிந்த ஜப்பானிய குழுவினர் நடுத்தெரு ஜீம்மா பள்ளி மற்றும் பழைய குத்பா பள்ளி ஆகியவற்றை பார்வையிட்டு அழகாக வடிவமைக்கப்பட்டுள்ள கட்டிட கலையை பாராட்டி சென்றனர் என்பது குறிப்பிடதக்கது

கீழக்கரை நகராட்சி சேர்ம‌ன் என்ற பெயரில் புதிய வலைதளம் உத‌ய‌ம்!

கீழக்கரை நகராட்சி தலைவர் திருமதி ராபியத்தில் காதரியா அவர்களின் அதிகாரப்பூர்வ இணைய பக்கமாக இந்த தளம் உருவாக்கப்பட்டுள்ளது, கீழக்கரை நகராட்சியின் வளர்ச்சி, நலப் பணிகள், தலைவர், மற்றும் உறுப்பினர்களின் செயல்பாடுகள், களப்பணிகள், அறிவிப்புகள் ஆகியவற்றினை கீழக்கரை சமூகத்திற்கு உடனுக்குடன் அறியத் தருவதற்கான முயற்சியாக இந்த தளம் அமைக்கப்பட்டுள்ளதாக இத்தளத்தில் தெரிவிக்கப்பட்டுள்ளது.

இத்த‌ள‌த்தின www.keelakaraichairman.blogspot.com ஆசிரியராக‌ எம்.ஹுசைனும் ,ஆலோச‌க‌ராக‌ ம‌ஹ்மூது நெய்னாவும் உள்ளார்க‌ள்.
இத்த‌ளத்திற்கு கீழ‌க்க‌ரை டைம்ஸ் சார்பாக மனமார்ந்த வாழ்த்துக்க‌ளை தெரிவித்து கொள்கிறோம்.

1வது வார்டுக்கு உட்பட்ட பகுதியில் சாலை அமைக்கும் பணி !

1வார்டுக்கு உட்பட்ட பகுதியில் சாலை அமைக்கும் பணி நடைபெற்று வருகிறது.இப்பணியை நகராட்சி தலைவர் ராபியத்து நேரில் சென்று மேற்பார்வையிட்டார்.

ராமேஸ்வரம் - மதுரை பகல் நேர ரயில்கள் இயக்க கோரிக்கை

ராமேஸ்வரம் - மதுரைக்கு அதிகாலை மற்றும் இரவு நேரத்தில் மட்டுமே ரயில் சேவை உள்ளது.எனவே பகல் நேரத்திலும் ரயில்கள் இயக்க வேண்டும் என கீழக்கரை மக்கள் கோரிக்கை எழுப்பியுள்ளனர்.

கீழக்கரையில் வியாபரம் செய்பவர்களில் பெரும்பாலானோர் மதுரையில்தான் மொத்த வியாபாரிகளிடம் கொள்முதல் செய்து இங்கு வியாபாரம் செய்து வருகின்றனர்.இவர்கள் தற்போது பஸ்கட்டணம் மிக அதிகமாக உயர்ந்துள்ளதை தொடர்ந்து ரயில் பயணத்தையே அதிகம் விரும்புகின்றனர்.

இது குறித்து கீழக்கரை சமூக நல நுகர்வோர் சேவை இயக்கத்தின் செயலாளர் ராதாகிருஸ்ணன் கூறுகையில் , கீழக்கரையிலிருந்து தினமும் 500க்கும் அதிகமானோர் பணி நிமித்தமாகவும் ,மருத்துவமனைக்கும் மதுரைக்கு சென்று வருகின்றனர்.தற்போது பஸ் கட்டணம் இரு மடங்காக உயர்ந்துள்ளது இதனால் பெரும்பாலானோர் பஸ் பயணத்தை தவிர்த்து ரயில் பயணத்தை விரும்புகின்றனர். ஆனால் இரவிலும் அதிகாலையிலும் ஒன்றிரண்டு ரயில்கள்தான் இயக்கப்படுகிறது.எனவே பொதுமக்களின் சிரமத்தை போக்க ரயில்வேதுறை அதிகாரிகள் நடவடிக்கை எடுத்து கூடுதல் ரயில் இயக்க நடவடிக்கை எடுக்க வேண்டும் மேலும் இது குறித்து ரயில்வேதுறைக்கு மனு அனுப்பியுள்ளோம் என்றார்.

கீழக்கரையில் பிப்ரவரி 2 முதல் பிளாஸ்டிக் பை,கப்களுக்கு தடை! வியாபாரிகள் ஏற்பு !

கீழக்கரை நகராட்சி அலுவலகத்தில் நகராட்சி உறுப்பினர்கள் மற்றும் வியாபாரிகள் கலந்தாலோசனை கூட்டம் நகராட்சி தலைவர் ராபியத்துல் காதரியா தலைமையில் நடைபெற்றது . முந்தைய நகராட்சி கூட்டத்தில் கீழக்கரையில் பிளாஸ்டிக் பை,கப் போன்றவை விற்பதற்கு 2012 ஜனவரி 1 முதல் தடை விதித்து தீர்மானம் நிறைவேற்றப்பட்டிருந்தது.இது குறித்து இக்கூட்டத்தில் வியாபாரிகளின் தரப்பில் கருத்து கேட்கப்பட்டது.
இக்கூட்டத்தில் நகராட்சி கமிஷனர் முஜிபு ரஹ்மான்,அலுவலர் சந்திரசேகர் ஆகியோர் முன்னிலை வகித்தனர்.இதில் கீழக்கரை வியாபாரிகள் சங்க பொருளாளர் சந்தாணகிருஷ்ணன்,செயற்குழு உறுப்பினர் பாஸ்கரன் மற்றும் ஏராளமான வியாபாரிகள் கலந்து கொண்டனர்.இக்கூட்டத்தில் பிளாஸ்டிக் பை மற்றும் கப்களினால் ஏற்படும் தீமைகள் குறித்து கமிசனர் முஜிப் ரஹ்மான் எடுத்து கூறினார்.

வியாபரிகள் தரப்பில் பிளாஸ்டிக் பொருள்களுக்கு ஜனவரிப் 1 முதல் தடை விதித்திருப்பதை மாற்றி கால அவகாசம் வேண்டும் என்று கேட்டிருந்தனர்.இதனையடுத்து நகராட்சி நிர்வாகத்தின் சார்பில் வியாபாரிகளின் கோரிக்கையை ஏற்று 2-2-2012 முதல் தடை விதிப்பு அமலுக்கு வருமென்று அறிவித்து தேதி மாற்றப்பட்டது.வியாபாரிகளும் நகராட்சியின் இம்முடிவுக்கு சம்மதம் தெரிவித்தனர்.

இதனை தொடர்ந்து பிப் 2ந்தேதி பிளாஸ்டிக் பைகள் மற்றும் கப்கள் விற்பனை மற்றும் உபயோகத்திற்கு தடை விதிப்பதாக நகராட்சி தலைவர் ராபியத்துல் காதரியா அறிவித்தார்.

கீழக்கரை அலவாய்கரைவாடியில் தீ விபத்து ! ஜவாஹிருல்லா.எம்.எல்.ஏவுக்கு கோரிக்கை

அலவாக்கரைவாடியில் இன்று நடந்த தீவிபத்தில் முற்றிலும் எரிந்த நிலையில் குடிசை

சில மாதங்களுக்கூ முன் கீழக்கரை ஸ்ரீநகர் பகுதியில் தீவிபத்தில் பாதிக்கப்பட்டவர்களுக்கு உடனடி உதவி செய்த சட்டமன்ற உறுப்பினர் ஜவாஹிருல்லா.

கீழக்கரை அருகே உள்ள அலவாய்க்கரைவாடியில் தங்கசாமிகமலா,முனியசாமி,சேதுராஜா(ஊனமுற்றவர்) ஆகியோருக்கு சொந்தமான மூன்று குடிசைகள் திடிரென ஏற்பட்ட தீ விபத்தில் எரிந்து சாம்பலானது.இதில் கமலா என்பவருக்கு சொந்தமான குடிசையில் இருந்த 6 பவுன் தங்க நகை மற்றும் மூன்று குடிசைகளில் உபயோகித்து வந்த வீட்டு உபயோக பொருட்கள் எரிந்து சாம்பலானது .இது குறித்து வி.ஏ.ஓ பாலையா விசாரித்து வருகிறார்.
இது குறித்து அப்பகுதியை சேர்ந்த முத்துசாமி கூறுகையில், சில மாதங்களுக்கு முன் அருகில் உள்ள பகுதியில் நடந்த தீவிபத்தில் பாதிக்கப்பட்டவர்களுக்கு நமது தொகுதி எம்.எல்.ஏ ஜவாஹிருல்லா உடனடியாக உதவி செய்து விரைவாக நிவாரணம் கிடைக்க ஏற்பாடு செய்தார்.அதே போல் இத்தீவிபத்தில் பாதிக்கப்பட்டவர்களுக்கு அவர் தலையிட்டு உதவிட வேண்டும் என்றார்

ரோட்டரி சங்கத்தின் இலவச மருத்துவ முகாமில் 300பேர் பயன் பெற்றனர் !

கீழக்கரை ரோட்டரி சங்கம் முகம்மது சதக் பாலிடெக்னிக் மற்றும் மீனாட்சி மிஷன் மருத்துவமனை இணைந்து நடத்திய இலவச மருத்துவ முகாம் கீழக்கரை கைராத்துல் ஜலாலிய அரபி பாடசாலை வளாகத்தில் நேற்று காலை நடைபெற்றது.இம்முகாமில் சதக் பாலிடெக்னிக் கல்லூரி முதல்வர் அலாவுதீன் ,கீழக்கரை ரோட்டரி சங்கத் தலைவர் செய்யது இப்ராகிம்,கைராத்துல் ஜலாலியா பள்ளியின் தாளாளர் டாக்டர் சாதிக், ஆகியோர் உள்பட பலர் கலந்து கொண்டனர்.மதுரை மீனாட்சி மிஷன் மருத்துவமனையின் 12 பேர் கொண்ட மருத்துவ குழு சிகிச்சை அளித்தனர். 300க்கும் மேற்பட்டோர் பயன்பெற்றனர்.நிகழ்ச்சி இறுதியில் சுப்பிரம்ணியன் நன்றி கூறினார்.

கீழக்கரையில் நகராட்சி துணை தலைவர் அலுவலகம் திறப்பு !

கீழக்கரை முஸ்லீம் பஜாரில் கீழக்கரை நகராட்சி துணை தலைவர் ஹாஜா முகைதீன் அலுவலகம் திறந்துள்ளார்.இதற்கான திறப்பு விழாவில் அதிமுக நகர செயலாளர் ராஜேந்திரன்,கவுன்சிலர் அன்வர் அலி,சித்தீக் அலி,முகைதீன் இப்ராகிம்,சிறுதொழில் மீனவர் சங்க செயலாளர் நல்ல இப்ராகிம் மற்றும் ரிஸ்வான்,உசைன் ஆலிம்,கிதுர் முகம்மது ,வேல்சாமி உள்பட ஏராளமானோர் கலந்து கொண்டனர். முன்னதாக பழைய குத்பா பள்ளி இமாம் ஹைதர் அலி துஆ ஓதி அலுவலகத்தை தொடங்கி வைத்தார்.

இது குறித்து துணை தலைவர் ஹாஜா முகைதின் கூறியதாவது, பொது மக்கள் என்னை சிரமமின்றி சந்தித்து குறைகளை தருவதற்கு வசதியாக இந்த அலுவலகத்தை திறந்துள்ளேன்.என்றார்

போலீஸ் பொதுமக்கள் சார்பில் விளையாட்டு போட்டி !

திருப்புல்லாணி அருகே உள்ள பொக்கெனேந்தல் கிராமத்தில் போலீஸ் மற்றும் பொது மக்கள் நட்புறவை வலுபடுத்தும் வகையில் விளையாட்டு போட்டிகள் நடைபெற்றது. இவ்விழாவை கீழக்கரை இன்ஸ்பெக்டர் இளங்கோவன் தலைமை தாங்கி விளையாட்டு போட்டிகளை தொடங்கி வைத்தார். மாணவ,மாணவியருக்கு ஓட்டப்பந்தயம் மற்றும் கபடி போட்டிகள் நடைபெற்றது.

போட்டி சாலையில் நடத்தப்பட்டதால் போக்குவரத்து சிறிது நேரம் தடைபட்டது .சிறுவர்களை ஊக்கப்படுத்தும் இது போன்ற விளையாட்டு போட்டிகள் அவசியம்தான் அதே நேரத்தில் சாலையில் செல்லும் வாகனங்களுக்கு தொந்தரவு இல்லாத வகையில் போட்டிகளை வேறு இடத்தில் நடத்த வேண்டும் என்று வாகன ஓட்டிகள் கேட்டு கொண்டனர்

நகராட்சி தலைவரின் விரைவான செயல்பாடு ! பொதுமக்கள் பாராட்டு (ப‌ட‌ங்க‌ள்)

முந்தைய நிலை: மணல் நிறைந்த சாலை

தற்போதைய நிலை: மணல் அகற்றப்பட்டு புதிய சிமெண்ட் சாலை அமைக்கப்படுகிறது.பணியை பார்வையிடும் நகராட்சி தலைவர்.

பேருந்து நிலையத்தில் கழிவு நீர் கால்வாய்கள் சுத்தப்படுத்தப்படுவதை பார்வையிடும் நகராட்சி தலைவர்

கீழக்கரை மேலதெருவில் உள்ள சாலையில் கட்டிட இடிபாடுகளை தொடர்ச்சியாக‌ கொட்டப்பட்டு வந்ததால் சிமெண்ட் சாலை மணல்பகுதியாக மாறி டூவீலரில் செல்வோர் கீழே விழுந்து அடிக்கடி விபத்துக்கள் ஏற்பட்டு வந்தது . மணல் சாலையாக உருவெடுத்து சேதமடைந்த சிமெண்ட் சாலையை உடனடியாக சரி செய்ய வேண்டும் என அப்பகுதியில் செல்வோர் நகராட்சி தலைவர் ராபியத்துல் காதரியாவிடம் கோரிக்கை வைத்தனர்.இதை தொடர்ந்து உடனடியாக பாதிப்படைந்த சாலையை நேரில் சென்று பார்வையிட்டு சிமெண்ட் சாலையை செப்பனிட நகராட்சி தலைவர் உத்தவிட்டதின் பேரில் புதிய சிமெண்ட் சாலை அமைக்கும் பணி நடைபெற்று வருகிறது.நகராட்சி தலைவரின் உடனடி நடவடிக்கையை அப்பகுதியை சேர்ந்தோர் பாராட்டு தெரிவித்தனர்.
கீழக்கரையின் நகராட்சி தலைவராக பொறுப்பேற்ற ராபியத்துல் காதரியா கீழக்கரையின் சுகாதார பிரச்சனைகள் மட்டுமின்றி பல்வேறு ஊர் நலன் தொடர்பான விசயங்களில் விரைவான நடவடிக்கை எடுத்து வருவது பொதுமக்கள் மத்தியில் மகிழ்ச்சியை ஏற்படுத்தியுள்ளது.குறிப்பாக பணிகள் நடைபெறும் இடங்களுக்கு தானே நேரில் சென்று பார்வையிட்டு பணிகளை விரைவு படுத்தி வருகிறார்.நகராட்சி தலைவரின் செயல்பாடுகள் இதே போல் தொடர்ந்தால் கீழக்கரை நகராட்சி முன்மாதிரி நகராட்சியாக மாறும் என்பதின் ஐயமில்லை.தொடர வேண்டும் என்பதுதான் கீழக்கரைவாசிகளின் எதிர்பார்ப்பாகும்.

ராமநாத‌புர‌ம் ர‌யில்வே கேட் அகற்றி புதிய மேம்பாலம்‌ அமைக்க‌ ஆய்வு !

ப‌ட‌ம்: ந‌ன்றி உண்மையாஉல‌க‌ம்.பிளாக்.காம்

கீழ‌க்க‌ரையிலிருந்து ராமநாதபுரம் செல்லும் வழியில் ராமநாதபுரம் எல்லையில் ரயில்வே கேட் உள்ளது.இவ்வழியாக நாளொன்றுக்கு நூற்றுக்கணக்காண வாகனங்கள் செல்கின்றன.ஒவ்வொரு முறையும் ரயில் செல்லும் போது இருபுறமும் உள்ள ரயில்வே கேட் மூடப்படுவதால் நீண்ட வரிசையில் வாகனங்கள் அணிவகுத்து நிற்கும்.இதனால் இப்பகுதியில் போக்குவரத்து நெரிசல் ஏற்பட்டு வாகன பயணிகள் மிகுந்த சிரமத்துக்கு உள்ளாகிறார்கள்.குறிப்பாக கீழக்கரையிலிருந்து ஏராளமானோர் மாவட்ட தலைநகரான ராமநாதபுரத்திற்கு செல்ல வேண்டிய சூழல் உள்ளது.அதிலும் அவசர சிகிச்சைக்காக ராமநாதபுரம் மருத்துமனைக்கு செல்பவர்கள் நிலை இன்னும் பரிதாபம் ரயில்வே கேட் மூடப்படுவதால் காத்து கிடந்து அதிகம் பாதிப்படைவது இவர்கள்தான்.
இது போன்ற சூழ்நிலைகளை தவிர்க்க‌ இப்பகுதியில் ரயில்வே மேம்பாலம் அமைக்க வேண்டும் என பொது மக்கள் நீண்ட காலமாக கோரிக்கை விடுத்து வந்தனர் .இதனையடுத்து நெடுஞ்சாலை துறை அதிகாரிகளும் ,ரெயில்வே அதிகாரிகளும் புதிய மேம்பாலம் அமைப்பது குறித்து ஆய்வு மேற்கொண்டனர். எத்தனை வாகனங்கள் இவ்வழியாக செல்கிறது.மேம்பாலம் அமைப்பதற்கு போதுமான இடம் என்பது போன்ற ஆய்வுகள் நடைபெற்றன.
இது குறித்து அதிகாரிகள் கூறியதாவது,இத‌ற்கான‌ ஆய்வு அறிக்கை ம‌த்திய மாநில அரசு ஒப்புதலுக்கு அனுப்ப‌ப‌டும் என்று தெரிவித்த‌ன‌ர்.
மேம்பால‌ம் அமைக்கும் ப‌ணி 2012 அல்ல‌து 2013ல் தொட‌ங்கும் என‌ தெரிய‌ வ‌ருகிற‌து

கீழக்கரை குப்பை பிரச்சனை முடிவுக்கு வருகிறது ! நகராட்சி தலைவர் பேட்டி !

நேற்று ராமநாதபுரத்தில் மாற்றுத்திறனாளிகள் தின விழா நேற்று நடந்தது. இவ்விழாவில் அமைச்சர் சுந்தராஜன்,ஜவாஹிருல்லா.எம்.எல்.ஏ,முன்னாள் அமைச்சர் அன்வர் ராஜா கீழக்கரை நகராட்சி தலைவர் ராபியத்துல் காதரியா,அதிமுக மாவட்ட செயலாளர் ஆனிமுத்து,அதிமுக மேலவை உறுப்பினர் ரிஸ்வான் உள்பட பலர் கலந்து கொண்டனர். வெற்றி பெற்ற‌ மாற்று திற‌னாளிக‌ளுக்கு ப‌ரிச‌ளிப்பு விழா ந‌டைபெற்ற‌து.

இவ்விழாவில் க‌ல‌ந்து கொண்ட‌ கீழ‌க்க‌ரை நக‌ராட்சி த‌லைவ‌ர் ராபிய‌த்துல் காத‌ரியாவிட‌ம் கீழ‌க்க‌ரைடைம்ஸ் சார்பாக‌ கீழ‌க்க‌ரை குப்பை பிர‌ச்ச‌னைக்கு நிர‌ந்த‌ர‌ தீர்வுக்கு ந‌ட‌வ‌டிக்கை எடுக்க‌ப்ப‌ட்டு வ‌ருகிறதா என்று கேட்ட‌ போது அவ‌ர் கூறிய‌தாவ‌து,

தில்லையேந்தல் பஞ்சாயத்துக்குட்ப‌ட்ட கீழ‌க்க‌ரை ந‌க‌ராட்சிக்கு சொந்தமான‌ இட‌த்தில் சுற்றுசுவ‌ர் எழுப்பி அங்கு குப்பையை கொட்டுவ‌து ச‌ம்ப‌ந்த‌மாக‌ இதுவரை 2க்கும் மேற்ப‌ட்ட‌ முறை கீழ‌க்க‌ரை ந‌க‌ராட்சி த‌லைவ‌ர் என்ற‌ வ‌கையில் நான், ஜவாஹிருல்லா எம்.எல்.ஏ மற்றும் தில்லையேந்த‌ல் ப‌ஞ்சாய‌த்து த‌லைவ‌ர் ஆகியோர் அம‌ர்ந்து இந்த‌ பிர‌ச்சனையில் சுமூக‌மாக‌ தீர்வு காண்ப‌த‌ற்கு ஆலோசனை ந‌ட‌த்தினோம்.ஜவாஹிருல்லா.எம்.எல்.ஏ அலுவலகத்தில் நடைபெற்ற இந்த ஆலோசனையில் பல் வேறு முக்கிய பிரமுகர்களும் உடன் இருந்தனர்.ஆலோசனை சுமூகமாக நடைபெற்றது மேலும் த‌ற்போதைய‌ தில்லையேந்தல் ப‌ஞ்சாய‌த்து த‌லைவ‌ர் எங்கள் கட்சியை(அதிமுக) சேர்ந்த‌வ‌ராக‌ இருப்ப‌தால் சுமூக‌மான‌ தீர்வு காண‌ எளிதாக‌ இருக்கும்.த‌ற்போது இப்பிர‌ச்ச‌னைக்கான தீர்வை வரைவு செய்யும் பணி இறுதி க‌ட்ட‌த்தில் உள்ள‌து. விரைவில் சுற்றுசுவ‌ர் எழுப்புவ‌த‌ற்க்கு டெண்ட‌ர் கோர‌ப்ப‌ட்டு ப‌ணிக‌ள் தொட‌ங்க‌ப்ப‌டும்.இப்ப‌ணிக‌ள் நிறைவ‌டைந்த‌வுடன் கீழக்கரை நீண்ட காலமாக நீடித்து வந்த குப்பை பிர‌ச்ச‌னைக்கு தீர்வு ஏற்ப‌ட்டு விடும்.

தமிழக முதல்வர் ஆதரவுடன் பொது மக்கள் ஒத்துழைப்புடன் கீழக்கரை நகராட்சியை முன்மாதிரி நகராட்சியாக மாற்றுவோம் இது உறுதி என்றார்

தில்லையேந்தல் பஞ்சாயத்தில் குறிப்பிட்ட இடத்தில் குப்பை கொட்ட கூடாது என்றும் சுற்றுசுவர் கட்டுவதற்கும் அப்பகுதியை சேர்ந்தோர் எதிர்ப்பு தெரிவித்து வந்தனர் என்பது குறப்பிட தக்கது

3ஆண்டாக தொடரும் முயற்சி !கண்டுகொள்ளாத இயக்கங்கள் !

பள்ளிகளில் அரசு பொது தேர்வின் போது மாணவர்களையும் ,மாணவிகளையும் ஒரே இடத்தில் தேர்வு எழுத செயவதினால் ஏற்படும் சிரமங்களை தவிர்க்க இருபாலரையும் தனி தனி அறைகளில் தேர்வு எழுத அனுமதிக்க கோரி கடந்த மூன்று ஆண்டுகளாக கீழக்கரை இஸ்லாமியா பள்ளி தாளாளர் முயற்சி செய்து வருகிறார்.

இது குறித்து அவர் தமிழக முதல்வர் ஜெயலலிதாவுக்கு அனுப்பியுள்ள கோரிக்கை மனுவில் ......
அரசு பொது தேர்வுகளில் மாணவ மாணவியரை ஒரே இருக்கையில் அமர வைத்து தேர்வுகளை எழுத கடந்த முறை இருந்த அரசு நடைமுறைத்தியது.இவ்வாறு ஒரே இருக்கையில் மாணவ மாணவியரை தேர்வு எழுத வைப்பதால் தேவையற்ற குழப்பங்கள் ஏற்படுவதுடன் அவர்களின் தேர்ச்சி சதவீதமும் குறைய வாய்ப்புள்ளது மேலும் விரும்பதகாத விளைவுகள் ஏற்பட வாய்ப்புள்ளதாக பெற்றோர்கள் வருத்தமும் கவலையும் அடந்துள்ளனர் குறிப்பாக முஸ்லீம் கோஷா மாணவியர் அதிகமுள்ள எங்களை போன்ற பள்ளிகளில் அதிக அளவில் நடைமுறை சிக்கல் ஏற்படுகிறது.
இதுகுறித்து தமிழக அரசுக்கும் மாநில கல்வித்துறை அதிகாரிகளுக்கும் மாவட்ட முதன்மை கல்வி அலுவலருக்கும் கடந்த இரண்டு ஆண்டுகளாக எங்கள் பள்ளியின் சார்பாகவும் பெற்றோர்களின் சார்பாகவும் எழுத்து பூர்வமாக முறையிட்டும் எந்த தீர்வும் ஏற்படாமல் உள்ளது.

எனவே தாங்கள் இவ்விசயத்தில் உடனடியாக தலையிட்டு மாணவ ,மாணவியரின் நலனின் பாதிப்பு ஏற்படாதவாறு தகுந்த நடவடிக்கை மேற்கொண்டு உதவுமாறு தாழ்மையுடன் கேட்டு கொள்கிறோம்.இவ்வாறு மனுவில் குறிப்பிடப்பட்டுள்ளது.

மேலும் இது பற்றி இஸ்லாமியா பள்ளிகளின் தாளாளர் எம்.எம்.கே முகைதீன் இப்ராகிம் கூறுகையில் ,
பொது தேர்வுகளில் மாணவிகளுக்கு தனி இடம் ஒதுக்க அனுமதிக்க வேண்டும் என்று நாங்கள் கடந்த மூன்று ஆண்டுகளாக முயற்சி செய்து வருகிறோம்.இது குறித்து வலியுறுத்த வேண்டும் இந்திய தவ்ஹீத் ஜமாத்,தமுமுக உள்ளிட்ட பல்வேறு அமைப்புகளிடமும் கோரிக்கை வைத்தோம் ஆனால் யாரும் இது குறித்து எந்த முயற்சியும் எடுக்கவில்லை.முன்னாள் எம்.எல்.ஏ ஹசன் அலி ,ஜவாஹிருல்லா.எம்.எல்.ஏ என்று பலரிடமும் கோரிக்கை வைத்து விட்டோம் ஆனால் எந்த நடவடிக்கையும் இல்லை.நமது மாணவிகளின் எதிர்கால கல்வி பாதிக்கப்படக்கூடாது என்ற அக்கறையில் நாம் தொடர்ந்து முயற்சி செய்து வருகிறோம். என்றார்.

பெற்றோர்களுடன் கல்வி ஆலோசனை கூட்டம் !

கீழக்கரை :
மாணவர்களின் பெற்றோரே நிரந்தர ஆசிரியர் என மாவட்ட முதன்மை கல்வி அலுவலர் ராதாகிருஷ்ணன் தெரிவித்தார்.
திருப்புல்லாணி ஒன்றியத்திற்கு உட்பட்ட அரசு மேல்நிலைபள்ளி, அரசு உதவிபெறும் பள்ளிகளில் பயிலும் அரசு பொதுத்தேர்வு எழுதும் மாணவர்களில் காலாண்டு, மாதாந் திர தேர்வுகளில் மூன்று படங்களுக்கு மேல் தோல்வியுற்ற மாணவர்கள் மற் றும் பெற்றோர் கலந்துரையா டல், ஆலோசனை கூட்டம் கீழக்கரை ஹமீதியா மெட்ரிக் பள்ளி வளாகத்தில் நடந்தது.
கூட்டத்திற்கு தலைமை வகித்து மாவட்ட முதன்மை கல்வி அலுவலர் ராதாகிருஷ்ணன் பேசியதாவது:
தேர்வு காலம் நெருங்கி கொண்டு உள்ளது. குழந்தைகள் நன்றாக பெற்றோர் அமைதியான சூழலை ஏற்படுத்தி தர வேண்டும். பெற்றோர் தான் நிரந்தர ஆசிரியர்கள். பள்ளிகளில் பயிற்றுவிக்கும் ஆசிரியர்கள் தற்காலிக ஆசிரியர்கள் ஆவர். குழந்தைகளிடம் மனம் திறந்து பேச வேண் டும். அப்போதுதான் உங்களுக்குள் புரிந்துணர்வு ஏற்படும்.
மாணவர்கள் அதிகாலையில் எழுந்து விடா முயற்சியுடன் படித்து வெற்றி பெற வேண்டும். இவ்வாறு அவர் பேசினார்.
கீழக்கரை இஸ்லாமியா மேல்நிலை பள்ளி தலைமையாசிரியர் ரவி, மஹ்து�மியா மேல்நிலை பள்ளி தலைமையாசிரியை கிருஷ்ணவேணி, கைரத்துல் ஜலாலியா பள்ளி தலைமையாசிரியர் முகம்மது மீரா, ஹமீதியா பள்ளிகளின் தலைமையாசிரியர்கள் சகர்பானு, ஞானகலாவதி, ஹசன் இபுராகிம், மற்றும் ஏராளமான ஆசிரியர்கள், மாணவர்கள், பெற் றோர் கலந்து கொண்டனர்.

கீழக்கரை முழுவதும் கழிவுநீர் வாய்கால் துப்புரவு பணி துவங்கியது !

பட விளக்கம் :- 21வது வார்டிலிருந்து தொடங்கிய இப்பணியை நகராட்சி தலைவர் ராபியத்துல் காதரியா,துணை தலைவர் ஹாஜா முகைதீன் , அன்வர் அலி உள்ளிட்ட கவுன்சிலர்கள் நேரில் பார்வையிட்டனர்.
கீழக்கரை நகராட்சியில் கழிவுநீர் வாய்கால்கள் தூர் வாராமல் குப்பைகள் மற்றும் மண் நிறைந்து இருந்ததால் சாக்கடை நீர் சீராக செல்லாமல் கழிவுநீர் வெளியேறி நகர் முழுவதும் பல்வேறு சாலைகளில் வழிந்தோடியது.துப்புரவு தொழிலாளர் பற்றாக்குறையினால் சுத்தம் செய்யப்படாமல் இருப்பதாக கூறப்பட்டது.
இந்நிலையில் நகரின் சுகாதாரத்தை சீர்குலைக்கும் இந்த‌நிலையை மாற்ற‌ போர்கால அடிப்படையில் உடனடி நடவடிக்கை எடுக்க நகராட்சி தலைவர் ராபியத்துல் காதரியா தலைமையில் உள்ள நிர்வாகத்தில் முடிவு செய்யப்பட்டு நகர் முழுவதும் 21வார்டுகளில் உள்ள கழிவுநீர் வாய்காலை தூர் வாரி சுத்தம் செய்யும் பணி ரு1லட்சம் செலவில் தனியாரிடம் ஒப்படைக்கப்பட்டது.தூர் வாரும் பணி இன்று தொடங்கியது .21வது வார்டிலிருந்து தொடங்கிய இப்பணியை நகராட்சி தலைவர் ராபியத்துல் காதரியா,துணை தலைவர் ஹாஜா முகைதீன் , அன்வர் அலி உள்ளிட்ட கவுன்சிலர்கள் நேரில் பார்வையிட்டனர்.
இதுகுறித்து சமூக நல ஆர்வலர் பாட்சா கூறியதாவது,நகராட்சியின் பணிகளை நேரில் தலைவர் மற்றும் உறுப்பினர்கள் நேரில் சென்று மேற்பார்வையிடுவது பணிகள் விரைவாகவும்,நேர்மையாக நடப்பதற்கு வழிவகுக்கும்.எனவே இது பாராட்டுக்குறிய விசயம்.மேலும் நம்மை போன்ற பொது மக்களும் குப்பைகளை கழிவு நீர் வாய்காலில் வீசாமல் நகரின் சுகாதாரத்திற்கு ஒத்துழைக்க வேண்டும் என்றார்.