கீழக்கரை அரசு மருத்துவமனையில் டாக்டர் பற்றாக்குறை !

 

கீழக்கரை அரசு மருத்துவமனையில் டாக்டர்கள் பற்றாக்குறை காரணத்தால் நோயாளிகள் அதிக நேரம் வரிசையில் காத்திருந்து அவதிப்படுகின்றனர்.

கீழக்கரை அரசு மருத்துவமனையில் ஏற்கனவே இரண்டு பெண் டாக்டர்கள் உட்பட 6 டாக்டர்கள் பணியில் இருந்து வந்தனர். தற்போது மூன்று டாக்டர்கள் மட்டுமே இருப்பதால் பொது மக்கள் நீண்ட நேரம் வரிசையில் காத்திருக் வேண்டிய சூழல் நிலவுகிறது.

 

கீழக்கரை அரசு மருத்துவமனையில் நாளொன்றுக்கு கீழக்கரை மற்றும் சுற்று வட்டாரங்களான மாயாகுளம், புல்லந்தை மற்றும் காஞ்சிரங்குடி, திருப்புல்லாணி உட்பட ஏராளமான கிராமங்களிலிருந்தும் வெளி நோயாளிகளாக 450 முதல் 500 பேர் வரை வந்து செல்கின்றனர்.

உள்நோயாளிகளாக 40 முதல் 60 பேர் தினமும் மருத்துவமனையில் அனுமதிக்கப்பட்டு சிகிச்சை பெற்று செல்கின்றனர். மேலும் தொடர்ச்சியாக 2 ஆயிரத்து 600 பேர் சக்கரை நோயாளிகளாக சிகிச்சை பெற்று வருகின்றனர். இருதய நோயாளிகளாக 600 பேர் சிகிச்சை பெற்று வருகின்றனர்.

 

ஏற்கனவே சர்க்கரை மற்றும் இருதய நோயாளிகளுக்கு சிகிச்சை அளிப்பதற்கும் தனித்தனியே டாக்டர்கள் இருந்தனர். தற்போது குழந்தை மருத்துவர்கள் இருவரும் மற்றும் பொது மருத்துவர் ஒருவர் மட்டுமே இருக்கின்றனர். இதனால் சக்கரை மற்றும் இருதய நோயாளிகள் பெரும் சிரமத்திற்குள்ளாகி வருகின்றனர். ஏற்கனவே இருந்தது போல் மருத்துவர்களை நியமிக்க வேண்டும் என்று பொது மக்கள் கோரிக்கை விடுத்துள்ளனர்.

 

இதுகுறித்து பொது நல சேவகர் ஹமீதுகான் கூறுகையில், ‘கீழக்கரை அரசு மருத்துவமனையில் ஏற்கனவே அதிகளவில் டாக்டர்களை நியமித்தும், நவீன கருவிகள் வரவழைக்கப்பட்டும், தனியார் மருத்துவமனைக்கு ஈடாக மாற்றிவந்தனர். டாக்டர்களை வேறு இடத்திற்கு மாற்றியதால் கீழக்கரை அரசு மருத்துவமனையில் நோயாளிகள் பரிதவிப்புக்கு உள்ளாகியுள்ளனர். இதனால் பொது மக்கள் குறிப்பாக சக்கரை மற்றும் இருதய நோயாளிகள் பெரும் சிரமத்திற்குள்ளாகின்றனர். மீண்டும் கூடுதல் டாக்டர்களை நியமித்து பொது மக்களின் சிரமத்தை போக்குவதற்கு மாவட்ட நிர்வாகம் நடவடிக்கை எடுக்க வேண்டும்’ என்றார்.